बिशाल चौतारी समाचार
काठमाडौं, २०८३ श्रावण ३१ आइतवार। कान्सजस्तो विश्वकै ठूलो फिल्म फेस्टिभलमा अवार्ड जितेर नेपालमा प्रदर्शनको तयारीमा रहेको चलचित्र ‘तिनीहरू : इलिफेन्ट इन द फग’को टोलीले काठमाडौंको भृकुटीमण्डपमा नाइमा मोबिलिटी शोमा विशेष प्रस्तुति दिएको छ ।

टोलीले कार्यक्रमको सुरुवात चलचित्रमा समावेश गीत ‘शादी के दिन में (ला ला ला ला)’को प्रस्तुति र नृत्यबाट गरेको थियो । त्यसपछि टोली एनआईयूको स्टलमा पुगेको थियो, जहाँ उनीहरूले चलचित्रको गीत ‘बलम’मा नृत्य प्रस्तुत गरेका थिए ।

टोलीको प्रस्तुतिमा उपस्थित दर्शकहरू उत्साहित हुँदै सहभागी भएका थिए । दर्शकले सिनेमाबारे चासो राख्दै हेर्न हलमा जाने बताएका थिए ।

त्यसपछि टोलीले महेन्द्राको स्टलमा समेत विशेष प्रस्तुति दिँदै उपस्थित दर्शकलाई मनोरञ्जन प्रदान गरेको थियो । दर्शकले सिनेमाका कलाकारलाई साथ दिँदै सिनेमा हेर्नका लागि प्रतिक्षारत रहेको बताएका थिए ।

यो चलचित्र कान्स फिल्म फेस्टिभलको यूएन सर्टेन रिगार्ड सेक्सनमा छनोट हुने पहिलो नेपाली फिचर फिल्म हो । यो विधामा छनोट भएर जुरी अवार्ड जितेर यो चलचित्रले नेपालको नाम इतिहासमा लेखेको  थियो ।

यसैबीच, यो चलचित्रको टोली के–पप काठमाडौं डान्स फेस्टिभलमा प्रमुख अतिथिका रूपमा सहभागी भएको छ । कार्यक्रममा टोलीले प्रतियोगिताका विजेता तथा सहभागीहरूलाई पुरस्कार तथा सम्मान प्रदान गरेको छ ।

कोरियन पप नृत्यको उत्सवका रूपमा आयोजना गरिएको कार्यक्रममा चलचित्रको टोलीले विजेता तथा सहभागी कलाकारहरूको हौसला बढाउँदै उनीहरूको प्रतिभाको सम्मान गरेको थियो ।

यस अवसरमा ‘तिनीहरू : इलिफेन्ट इन द फग’ कार्यक्रमको मुभी पार्टनर समेत रहेको थियो ।

यसैगरी, ‘तिनीहरू : इलिफेन्ट इन द फग’को टोलीलाई इन्फा अवार्डद्वारा विशेष सम्मान गरिएको छ ।

काठमाडौंमा आयोजित एक विशेष कार्यक्रममा चलचित्रको टोलीलाई नेपाललाई अन्तर्राष्ट्रिय मञ्चमा गौरवान्वित बनाएको भन्दै योगदानका लागि विशेष सम्मान गरिएको छ ।

सोही अवसरमा काठमाडौं महानगरपालिकाकी कार्यवहाक मेयर सुनीता डंगोलले चलचित्रको प्रशंसा गर्दै कान्स फिल्म फेस्टिभलमा भएको फिल्मको वर्ल्ड प्रिमियरमा आफू सहभागी भएको अनुभव सुनाइन् ।

उनले कान्समा चलचित्रले पाएको आठ मिनेट लामो स्ट्यान्डिङ अवेसन स्मरण गर्दै नेपाली फिल्मले अन्तर्राष्ट्रिय मञ्चमा प्राप्त गरेको यो उपलब्धि गौरवको विषय भएको बताइन् ।

डंगोलले दर्शकहरूलाई समेत यो चलचित्र हेर्न आग्रह गर्दै नेपाली चलचित्रलाई माया र समर्थन गर्न आह्वान गरिन् ।

‘तिनीहरू : इलिफेन्ट इन द फग’ भदौ १९ देखि नेपालमा प्रदर्शन हुँदैछ ।