विशाल चौतारी समाचार
नेपालगञ्ज ,२०७७  पौष २६ आइतवार । डडेल्धुरामा आज बिहान भएको ट्रक दुर्घटनामा चालकको मृत्यु भएको छ।

धनगढीबाट अछामका लागि हिँडेको ना ६ ख ३८१७ नम्बरको ट्रक डडेल्धुराको अमरगढी नगरपालिका-११, सल्लाघारीमा बिहान ३ बजे दुर्घटना भएको थियो।

दुर्घटनामा कैलाली गेटाका अन्दाजी ३५ वर्षीय चालक ओमप्रकाश पन्तको मृत्यु भएको जिल्ला प्रहरी कार्यालय डडेल्धुराका प्रहरी नायव उपरीक्षक महेन्द्र नेपालले जानकारी दिए।

ट्रकका सहचालक बाजुरा बडिमालिका नगरपालिका-५ का १८ वर्षीय मदन साउँद घाइते भएका छन्। उनको डडेल्धुरा अस्पतालमा उपचार हुँदैछ।

ट्रक सडकबाट २५० मिटर तल खसेको छ। दुर्घटनाको कारण भने नखुलेको प्रहरीले जनाएको छ।