पीसीआर परीक्षणका मापदण्ड, तौरतरिकामा पनि उनलाई चित्त बुझेको छैन । कोरोना संक्रमितको तथ्यांकमा उतारचढाव देखिएको उल्लेख गर्दै उनले भने, ‘आज ५ हजार आयो, भोलि २ हजार पनि कहीँ हुन्छ ? त्यो त सिधै नियन्त्रणतर्फ गयो भन्ने हो नि । ९ दिन १० दिनसम्म नमुनाहरु जम्मा गरेर राखेको छ, कहाँकहाँका नमुनाहरु पर्दा ५ हजार आयो, अर्कोदिन २ हजार २२ सय आउँछ । यो त २४ घण्टाको ताजाताजा तथ्याङ्कहरु भयो भने बल्ल तपाईले भन्न सक्नुहुन्छ कि यो बढ्दो क्रममा छ कि घट्दो क्रममा छ ।

सरकारले कोरोना संक्रमणविरुद्ध अहिलेसम्म अपनाएका रणनीति परिणमुखी नदेखिएको उनले बताए । ‘योजना नै रहेनछ स्वास्थ्य मन्त्रालयको, हेल्थ सेक्टर इमरजेन्सी रेस्पोन्स प्लानमात्रै बनाएको रहेछ । खास चाहिने हामीलाई के थियो भने हेल्थ सेक्टर प्रिपियरनेस प्लान चाहिन्थ्यो । उहाँहरुले भूकम्पको योजना बनाउनुभयो । चाहिने थियो हामीलाई सरुवारोग नियन्त्रणको योजना अथवा रोकथामको योजना ।’

जो जहाँ छ, त्यहीँ दसैँ मनाउनू भनेर स्वास्थ्य मन्त्रालयका प्रवक्ता सार्वजनिक रुपमा गरेको आग्रहलाई पनि उनले सान्दर्भिक नभएको टिप्पणी गरे । उनले भने, ‘अब यहाँ बसेको मान्छे धादिङमा नजा, नौबिसे नजा, काभ्रेको पाँचखाल नजा भनेर यहाँ बस्छ र ? उहाँहरुलाई भन्ने के हो भने तपाईहरु घरमा जानचाहिँ जानुहोस्, अलग्गै सुत्नुस् । एकप्रकारकै क्वारेन्टाइनकै व्यवस्था गरेर घरमै बस्नुस्, मास्क लगाएर खुला ठाउँमा, खुला हावामा बसेर टिका लगाउनुस्, धेरै मान्छे एकैपटक जम्मा नहुनुस्, थोरै मान्छे जम्मा हुनुस्, खानपिन अलि परपर बसेर दुई÷तीन मिटरको दुरी कायम गरेर मात्रै गर्नुस् ।’