The Congress will not leave the power
विशाल चौतारी समाचार
काठमाडौँ ,२०७४ पुस ६ बिहिवार । मंसिर १० र २१ दुई चरणमा भएको निर्वाचनको नतिजा प्रकाशित नगर्न माग गर्दै कांग्रेस अदालत जाने निर्णय गरेको छ ।
समानुपातिकतर्फको अन्तिम सिट निर्धारण गरी मतपरिणामको नतिजा आयोगले सार्वजनिक गरे कांग्रेस त्यसलाई रोक्न अदालत जाने अदालत जाने कांग्रेस नेता मिनेन्द्र रिजालले बताएका छन् ।
प्रतिनिधिसभाको निर्वाचन नतिजा आएपछि बहुमत प्राप्त दलको नेतालाई राष्ट्रपतिले प्रधानमन्त्री चयन गर्ने संवैधानिक ब्यवस्था छ । तर, नेपाली कांग्रेसले आफू पराजित भएपछि राष्ट्रियसभा निर्वाचन नगरी प्रतिनिधिसभाको नतिजा सार्वजनिक गर्न नमिल्ने अड्डी लिंदै आएको छ ।
निर्वाचन आयोगले प्रतिनिधिसभाको निर्वाचन नतिजा घोषणा गरे त्यसलाई पनि अस्वीकार गर्ने र राजनीतिक संवाद पनि नगर्ने नीति कांग्रेसले अख्तियार गरेको हो । वाम गठबन्धनले चुनाव जिते अधिनायकवाद आउँछ भन्ने चुनावी नारा दिंदै आएको कांग्रेसले चुनाव हारेर पनि सत्तामा रहिरहने रणनीति अख्तियार गरेको हो ।
सरकार नछोड्ने र प्रतिनिधिसभाको निर्वाचन नतिजा पनि सार्वजनिक गर्न नदिने मात्र होइन कांग्रेसले यसबीचमा राजनीतिक संवाद पनि नगर्ने नीति लिएको छ । राजनीतिक निकासका विषयमा दलका नेताहरूसँग कुनै छलफल नगरेको र आगामी दिनमा पनि नगर्ने प्रधानमन्त्रीको सचिवालयले बताएको छ ।
प्रधानमन्त्रीका स्वकीय सचिव अधिवक्ता केशव जोशीले अध्यादेश राजनीतिक सहमतिका आधारमा निकास निकाल्ने विषय नभएकाले दलीय छलफल आवश्यक नरहेको बताए । ‘अध्यादेश दलहरूबीच सहमतिका लागि छलफल गर्ने विषय होइन, संविधान र कानुनअनुरूप तयार पार्ने दस्ताबेज हो,’ जोशीले भनेका छन् ।