Ram Krishna Dhakal South Asian Music Award 2015
विशाल चौतारी समाचार
काठमाडौ, २०७१, चैत १०, मंगलबार । नेपालका चर्चित गायक रामकृष्ण ढकालले बंगलादेशको ढाकामा आयोजित दोस्रो दक्षिण एसियाली संगीत महोत्सवमा म्युजिक अवार्ड पाएका छन् । रामकृष्णलाई अवार्डसंगै एक हजार डलरपनि प्रदान गरिएको थियो । अवार्डका बारेमा जानकारी दिन राजधानीमा हिजो सोमबार आयोजित पत्रकार सम्मेलनमा रामकृष्णले सो अवार्ड पाएको प्रति खुसी व्यक्त गरे ।
दक्षिण एसियाली मुलुकबीचमा संगीतका माध्यमबाट भाइचारा कायम गर्ने उद्देश्यले सन् २०१३ मा स्थापाना भएको साउथ एसियन म्युजिक अवार्डको दोस्रो संस्करणमा गायक रामकृष्ण ढकालले पाएका हुन् । उनले अवार्ड चैत ६ मा पाएका हुन् ।
पत्रकार सम्मेलनमा अवार्ड पाएको खुसि बाढ्दै भने–‘उहाँहरुले यसपालि अवार्डका लागि मलाई योग्य ठान्नुभयो । यो मेरो मात्र अवार्ड नभएर नेपाली साङगीतिक क्षेत्रकै लागी गौरवको विषय समेत रहेको छ । मलाई लाग्छ यो अवार्ड पाउनमा, सायद लता मंगेशकरसँग गीत गाएको पोर्टफोलियोले पनि बल पुर्याएको हुन सक्छ,’ रामकृष्णले बताए । गायक ढकालले केही वर्ष अगाडी भारतीय चर्चित गायिका लतासँग युगल गीत ‘बाँचुन्जेलीलाई’ गाएका थिए ।
गायक रामकृष्ण ढकालले बताए अनुसार उनलाई बंगलादेशी प्रधानमन्त्रीका सल्लाहकार गोहेर रिज्वी, सांसद फजिल अटुन्सी बप्पी तथा ढाकास्थित नेपाली राजदूत हरिकुमार श्रेष्ठले संयुक्त रुपमा अवार्ड प्रदान गरेका थिए । कार्यक्रममा आफूले ‘बिहान उठ्ने बित्तिकै, मन पराउने हजार भेटिन्छन्, बाँचुञ्जेलललाई र ओराली लागेको’ बोलको गीत प्रस्तुत गरेको जानकारी दिए ।
अवार्ड समारोहमा दक्षिण एसियाली मुलुकका ख्यातिप्राप्त संगीतकर्मीको उपस्थिति रहेको थियो । रामकृष्णले महोत्सव आयोजक साउथ एसियन म्युजिक इन्स्टच्युटले तेस्रो संस्करण नेपालमा गर्न चाहेको पनि उल्लेख गरे ।
प्रतिक्रिया