Bisal Chautari Logo

‘बाटुलो जून’को ‘पानी पर्‍यो’ बोलको गीत सार्वजनिक

- ४ मंसिर २०८३, बिहीबार २३:२० मा प्रकाशित


बिशाल चौतारी समाचार
काठमाडौं, २०८३ मंसिर ३ बिहिवार।
गत हप्ताबाट नेपालसँगै विश्व बजारमा एकसाथ प्रदर्शनमा आएको चलचित्र ‘बाटुलो जून’मा समावेश ‘पानी पर्‍यो’ बोलको गीत सार्वजनिक भएको छ । निर्माण टिमले चलचित्र प्रदर्शनमा आएको हप्ता दिनपछि रोमान्टिक गीत युट्युब रिलिज गरेको हो ।

गीतमा दुई पुस्ताको प्रेमकथालाई दृश्यात्मक रूपमा देखाइएको छ । अभिनेता अनमोल केसी र अभिनेत्री प्रिन्सी खतिवडाले पछिल्लो पुस्ताको प्रेमिल भावलाई प्रतिनिधित्व गर्दा निर्देशक समेत रहेका अभिनेता भुवन केसी र अभिनेत्री गरिमा पन्तबीच अधबैंशे प्रेम देख्न सकिन्छ ।

नेपाली चलचित्र क्षेत्रमा सदाबहार स्टारको उपमा पाएका अभिनेता भुवन केसी बर्षौंपछि रोमान्टिक अबतारमा दर्शकमाझ देखिएका छन् । पुराना नेपाली चलचित्रका’रोमान्टिक हिरो’ भुवन केसी नेपाली म्युजिक भिडियो इतिहासमा पहिलो मोडल भनेर चिनिन्छन् ।

सार्वजनिक गीतले चलचित्रको समग्र कथालाई पूर्णताको मिठास प्रदान गरेको निर्माण टिमले बताएको छ। निर्देशक केसी भन्छन्: ‘यो गीत चलचित्रको उत्कृष्ट प्रस्तुतिमध्येको एक हो, जसले स्वादिष्ट भोजनपछिको मिठासिलो परिकार (डेजर्ट) को अनुभूति गराउँछ ।’  

सनराइज पिक्चर्स प्राली र भविष्य फिल्मस् को ब्यानरमा बनेको ‘बाटुलो जून’लाई जिया केसी र भविष्य खड्काले निर्माण गरेका हुन् । चलचित्रमा नेन्सी खड्का, प्रकाश घिमिरे, लक्ष्मीनाथ तिमिल्सिना, लक्ष्मी गिरी, दीपक केसी, रेअर राई, श्वेता मिश्र, सुजन भाई, सविन कट्टेल, सिद्धार्थ सिंह, अमितेश शाह, हीना नगरकोटी र संगी अधिकारी पोखरेलसमेत अभिनयमा छन् । विवेक थापा फिल्मका सह- निर्माता हुन् ।

कृष्ण भण्डारी सम्पादक रहेको चलचित्र लेखनमा सामीप्यराज तिमल्सेनासँग सरिन पोखरेलले सहकार्य गरेका छन् । यो चलचित्रमा पार्श्व संगीत रोमन बज्राचार्यको छ भने प्रदीप श्रेष्ठ एसोसिएट निर्देशक छन् ।

प्रतिक्रिया