बिशाल चौतारी समाचार
काठमाडौं, २०८२ भाद्र १५ आइतवार। गएको बिहीबार (भदौ १२) देखि देशभर प्रदर्शनमा आएको नेपाली चलचित्र कोशेढुङ्गाले शनिबार देशभरका अधिकांश हलहरुमा ८० प्रतिशत अकुपेन्सी कायम गरेको छ । निर्माण टिमका अनुसार प्रदर्शनको तेस्रो दिनमा दर्शकको उपस्थिती निकै राम्रो भएको र देशैभरीका अधिकांशहलहरु हाउसफुल भएका थिए ।

चलचित्रका निर्देशक सरोज पौडेलले शनिबारको दर्शक उपस्थिति चलचित्रको लागि ठूलो उपलब्धि भएको बताएका छन् । पछिल्लो समय माउथ पब्लिसिटीका कारण दर्शकको संख्या बढ्दै गएको निर्देशक पौडेलको भनाई छ । “शुक्रबारदेखि नै प्रतिक्रिया उत्कृष्ट थियो। शनिबार ८० प्रतिशत भन्दा बढी अकुपेन्सीसहित हाउसफुल शो चल्दा हामीलाई अझै उत्साह मिलेको छ,” उनले भने, “हामिलाई समिक्षात्मक रुपमा त धेरैले राम्रो प्रतिक्रिया दिनुभएको छ ।

अब ब्यवसायिक हिसाबमा पनि चलचित्र सफलताको बाटोमा छ । खुसी लागेको छ । चलचित्रले नेपाली समाजमा विदेशिएको श्रमिकको मृत्युदण्डको घोषणापछि परिवारले भोग्नुपरेको पिडासँगै ब्लड मनी (क्षतिपूर्ति रकम) वरिपरिको कथावस्तु बोकेको छ । हलबाट निस्किएका दर्शक भावुक भएका दृश्यहरु अहिले सामाजिक सञ्जालमा छरिएका छन् । चलचित्रमा सुरक्षा पन्त, मन्जिल कुमार, आर्यन सिक्देल, ऋचा शर्मा, नीति शाह, प्रवीण खतिवडा, सरोज खनाल, विशाल पहाडी, लोकमणि सापकोटा, हिउवाला गौतम, सिर्जना अधिकारी, शेखर चापागाई, दिनेश काफ्ले, सिरु विष्ट, स्नेहा जोशी, सुबलमणि सापकोटा र सविता रेग्मीको अभिनय रहेको छ ।

निर्मातामा प्रेविल कँडेल र किशोर अनुराग रहेका छन् भने कार्यकारी निर्माता दिनेश खड्का हुन्। छायांकन बाबु श्रेष्ठ, सम्पादन सुरेन्द्र पौडेल र संगीत रिदम कँडेल तथा आशिष अविरलले गरेका छन्। ‘कोशेढुंगा’लाई सेभेन सिज इन्टरटेनमेन्टमार्फत अन्तर्राष्ट्रिय बजारमा समेत रिलिज गरिएको छ।