विशाल चौतारी समाचार
काठमाडौं, २०७९ भाद्र १७ शुक्रबार । शुक्रबार हलमा दुई नेपाली फिल्म रिलिज भएका छन् । मल्टिस्टारर फिल्म ‘सम्हालिन्छ कहिले मन’ र ‘झिंगेदाउ’ प्रदर्शनमा आएका छन् ।

सुदर्शन थापा निर्देशित ‘सम्हालिन्छ कहिले मन’मा पूजा शर्मा, आकाश श्रेष्ठ र सोनम तोप्देनको प्रमुख भूमिका छ । त्रिकोणात्मक प्रेमकथामा आधारित फिल्मलाई लभस्टोरी रुचाउने दर्शकले मनपार्न सक्छन् । बेलायतमा छायांकन गरिएको फिल्मको सिनेमाटोग्राफीपनि उत्कृष्ठ रहेको निर्माण टिमको भनाइ रहेको छ ।

ज्ञानेन्द्र देउजा निर्देशित ‘झिंगेदाउ’ भीमनिधि तिवारीको कथामा आधारित छ । यो सोसल ड्रामा फिल्मले पारिवारिक किचलोको कथा भन्छ । बाहिरियाले आँखा लगाउँदा कसरी परिवार भत्किन्छ भन्ने सन्देश फिल्ममा छ । मुकुन भुसाल, केकी अधिकारी, आँचल शर्मा, कुशल बिष्ट र हिँउवाला गौतमको प्रमुख भूमिका रहेको छ ।

‘झिँगेदाउ’ र ‘सम्हालिन्छ कहिले मन’ले मल्टीप्लेक्स हलमा समान शो पाएका छन् भने सिंगल थिएटर पनि बराबरी जस्तै नै छ । प्रदीप खड्का स्टारर फिल्म प्रकाश शुक्रबारदेखि दोस्रो सातामा प्रवेश गरेको छ । वर्ड अफ माउथ बलियो भएकाले फिल्मले दोस्रो साता पनि राम्रो कमाइ गर्ने अपेक्षा छ ।