विशाल चौतारी समाचार
काठमाडौं, २०७७ मंसिर २३ मंगलवार । कोभिड–१९ को संक्रमण भएका सार्वजनिक निकायका कर्मचारीहरुको आइशोलेसनमा बसेको अवधिलाई सरकारले सार्वजनिक बिदाको रुपमा जनाउन सुरु गरिएको छ ।

संघीय मामिला तथा सामान्य प्रशासन मन्त्रालयले त्यसरी आईशोलेसनमा बसेको अवधिलाई सार्वजनिक बिदाको रुपमा जनाउने व्यवस्था गर्न सबै मन्त्रालय, सचिवालय, आयोग प्रतिष्ठान, विभाग, जिल्ला समन्वय समिति तथा स्थानीय तहहरुलाई यो व्यवस्था कार्यान्वयन गर्न परिपत्र गरेको हो ।

त्यस्तै, संक्रमणको लक्षण देखिएर आइशोलेसनमा बसेका कर्मचारीलाई अस्पताल भर्ना भएको अवधिभर बिदा कायम गर्न समेत मन्त्रालयले परिपत्र गरेको छ । यसरी बिदा बस्दा यसको व्यहोरासहित कार्यालय प्रमुखले बिदा प्रणाणित गर्नुपर्ने व्यवस्था गरिएको छ ।

त्यस्तै, सार्वजनिक निकायका कुनै कर्मचारी संक्रमित भएमा कन्ट्याक्ट ट्रेसिङमा परेका कर्मचारीलाई समेत कार्यालय आउन नपर्ने व्यवस्था गरिएको छ । यस्तो अवस्थामा कन्ट्याक्ट ट्रेसिङमा नपरेका कर्मचारीहरुबाट मात्रै सार्वजनिक सेवा प्रवाह गर्ने व्यवस्था मिलाउन मन्त्रालयले परिपत्र गरेको छ । यसको नियमित अनुगमन गर्ने काम सम्बन्धित मन्त्रालय तथा प्रदेश संकट व्यवस्थापन केन्द्र र जिल्ला कोभिड–१९ संकट व्यवस्थापन केन्द्रको हुने उल्लेख गरिएको छ ।

मन्त्रिपरिषद्को मंसिर १० गतेको बैठकले कोभिड–१९ को संक्रमणका कारण नियमित रुपमा हाजिर हुन नसकेका कर्मचारीको सम्बन्धमा सार्वजनिक बिदा कायम गर्ने सम्बन्धमा निर्णय गरेको थियो । यो परिपत्रसँगै यसअघि आइशोलेसन वा अस्पतालमा रहेका संक्रमित कर्मचारीको हकमा समेत बिदा कायम गर्ने बाटो खुल्नेछ ।

संघीय मामिला मन्त्रालयले निजी क्षेत्रका संघ संस्था तथा कार्यालयहरुलाई समेत यही अनुसार व्यवस्था गर्न अनुरोध समेत गरेको छ ।