ब्रेकर : अन्तर्राष्ट्रिय प्रतिस्पर्धामा नेपाली खेलाडीको स्तर धेरै तल पाएको सुनाउँदै यिनले भने, ”सरकार तथा निजी क्षेत्रको सहयोग नभई यो खेल उँभो लाग्न धेरै गाह्रो छ ।” खेल समय नजिकिँदा महिनाको एक लाख रुपैयाँभन्दा बढी र अन्य बेला ३० हजारको हाराहारीमा खचिर्ने दाबी गर्छन् यिनी । ”तर खेलमा मिलेको सफलताअनुसार कमाइ र व्यस्तता पनि बढेको छ”, कुनैसमय पत्निले विवाहमा किनिदिएको गहना समेत बेचेर हौसला दिएको स्मरण गर्दै उनी गम्भीर हुँदै बोले, ”खर्च भए पनि आफ्नो र देशको नाम राख्न पाएकामा सन्तुष्ट छु ।”

निर्मल श्रेष्ठ
५ भाद्र हङकङ ।  
नेपाल प्रहरीका पूर्व जवान रामबहादुर दाहाललाई शारीरिक सुगठन प्रतियोगिता भिडेर देश–विदेशमा नाम कमाइएला भन्ने रत्तिभर सोच थिएन । साथीभाइका मोटा पाखुराअघि लिखुरे शरीरले गराएको हीनताले जिमखानासम्म डोर्‍याएछ । त्यही ज्यान तंग्रिएपछि भने यिनलाई प्रतियोगितानै भिड्नेसम्मको आत्मबल मिलेछ । अञ्चल र क्षेत्रीय स्तरका प्रतियोगिता जितेर राम्रा खेलाडीको पहिचान बनाइसकेका दाहाललाई धरानमा आयोजित चौथो ”मिस्टर हिमालय” (२०१२) को शिर्ष उपाधिले एकाएक राष्ट्रिय चर्चा दिलाएको हो ।
त्यसयता सहभागिता जनाएको पछिल्ला दुबै अन्तर्राष्ट्रिय प्रतिस्पर्धामा पदक जितेपछि यिनको चर्चा थप चुलिएको छ । हालै हङकङमा आयोजित ”इन्टरनेसनल बडीबिल्डिङ एन्ड फिटनेस इनभिटेसन च्याम्पियनसिप” मा उनी ६५ केजी मुनिको नोभिस तौल समूहमा फस्ट रनरअप बनेका हुन् । च्याम्पियनसिपमा हङकङ, चीन, मकाउ, ताइवान, फिलिपिन्स, ब्रुनाई, साउथ कोरिया, जापान लगायत मुलुकका करिब १ सय ८० महिला तथा पुरुष खेलाडीहरको सहभागिता थियो । स्थानीय संस्था ”हङकङ नेप्लिज फेडरेसन अफ बडीबिल्डिङ एण्ड फिटनेश” ले दाहाल लगायत ६ नेपाली खेलाडीलाई उक्त प्रतियोगिता भिड्न सघाएको हो । गतवर्ष नोभेम्बरमा भारतको पंजाबमा आयोजित दक्षिण एसियाली शारीरिक सुगठनमा समेत दाहालले ६५ केजी तौल समूहमा दोश्रो पदक जितेका थिए ।
त्यसो त अहिलेसम्म सहभागी प्रतियोगिताहरमा यिनी एकपटक बाहेक पदकविहिन भएका छैनन् । प्रहरीमा जागिरे छँदै सहभागिता जनाएको ”मिस्टर धरान” सबैभन्दा पहिलो प्रतिस्पर्धा थियो । सुरुवाती प्रतियोगितामै ”ओभरअल च्याम्पियन” बनेका यिनले लगालग ”मिस्टर पूर्वाञ्चल”, ”मिस्टर कोसी”, ”मिस्टर बुढासुब्बा” को उपाधि जिते । प्रतिष्ठित धर्मश्रीमा कुनै बेला शिर्ष उपाधिका लागि शारीरिक सुगठनका चचिर्त खेलाडी सानु गुरुङसँग भिडेका दाहालले उतिबेला दोश्रो स्थानमै चित्त बुझाउनुपर्‍यो । मिस्टर हिमालयमा फेरि उनैसँग आमनेसामने भयो । तर यसपटक भने दाहालले बाजी मारे । ”तेह्र वर्षदेखि निरन्तर यस खेलमा छु,” दाहालले कुराकानी भने, ”प्रतीक्षाको फल मिठो हुन्छ भन्थे, दु:ख गरेअनुसार बिस्तारै सफलता मिल्दै छ ।”
जुडोका ब्ल्याक बेल्ट यिनी कुनै समय नेपाल प्रहरी प्रतिष्ठानमा प्रशिक्षक थिए । २०५४ देखि करिब ६ वर्ष प्रहरीमा जागिरे दाहालले नोकरीसँगै जुडो पनि छाडे । तर पछुतो छैन । खेलकुदलाई नै पेसा बनाएका यिनी विगत साढे पाँच वर्षदेखि दुबईस्थित होटल र्‍याडिसनमा फिटनेश प्रशिक्षक छन् । त्यसअघि साउदी अरबमा थिए । ”बडीबिल्डिङ खेल भनेको दुवै हातमा लड्डु हो,” कसरी ? जिज्ञासामा दाहाल हाँस्दै बोले, ”जिते राम्रै भो, हारे पनि बनेको शरीर त आफ्नै हो नि ।” तर महँगो खेल भएकाले अन्तर्राष्ट्रिय प्रतियोगिता भिड्न मनग्य लगानी गर्नुपर्ने यिनको अनुभव छ । अन्तर्राष्ट्रिय प्रतिस्पर्धामा नेपाली खेलाडीको स्तर धेरै तल पाएको सुनाउँदै यिनले भने, ”सरकार तथा निजी क्षेत्रको सहयोग नभई यो खेल उँभो लाग्न धेरै गाह्रो छ ।” खेल समय नजिकिँदा महिनाको एक लाख रुपैयाँभन्दा बढी र अन्य बेला ३० हजारको हाराहारीमा खचिर्ने दाबी गर्छन् यिनी । ”तर खेलमा मिलेको सफलताअनुसार कमाइ र व्यस्तता पनि बढेको छ”, कुनैसमय पत्निले विवाहमा किनिदिएको गहना समेत बेचेर हौसला दिएको स्मरण गर्दै उनी गम्भीर हुँदै बोले, ”खर्च भए पनि आफ्नो र देशको नाम राख्न पाएकामा सन्तुष्ट छु ।”
प्रहरीमा जागिरे छँदाका हाकिम लीलानाथ पन्तलाई यिनले अझै विर्सन सकेका छैनन् । खेलप्रेमी उतिबेलाका प्रहरी निरीक्षक उनैले दाहालको बडीबिल्डिङ प्रतिको लगावलाई हौस्याएर मलजल गरेका थिए । आगामी अगस्ट २७ देखि सेप्टेम्बर २ सम्म भियतनाममा हुने ४७ औँ एसियन बडीबिल्डिङ च्याम्पिएनसिपमा यिनले नेपालको प्रतिनिधित्व गर्दै छन् । उनीसँगै अन्य दुई नेपाली खेलाडी पनि छनौट भएका छन् । ”सबै गेममा जित्ने प्रयास हुन्छ नै,” लाइटवेटमा नेपालले राम्रो प्रर्दशन गर्नसक्ने सम्भावना रहेको बताउँदै बिर्तामोडका ३४ वर्षीय दाहालले भने, ”देशको नाम राख्न सक्दो प्रयास गर्नेछु ।” कान्तिपु दैनिक साभार