विशाल चौतारी समाचार
भक्तपुर, २०७७   मंसिर ५ शुक्रवार । भक्तपुरका ८१.४७ प्रतिशत कोरोना भाइरस संक्रमित डिस्चार्ज भएका छन् । यहाँका ३ हजार ३ सय ६५ पुरुष र २ हजार ५ सय ९८ महिला गरी ५ हजार ९ सय ६३ जना संक्रमित डिस्चार्ज भएका हुन्।

स्वास्थ्य कार्यालय भक्तपुरले ७ हजार ४ सय १३ संक्रमितमध्ये ८१.४७ प्रतिशत अर्थात ५ हजार ९ सय ६३ जना डिस्चार्ज भएको जनाएको हो । भक्तपुरमा ४ हजार २ सय ३ पुरुष र ३ हजार २ सय १० महिला गरी ७ हजार ४ सय १३ संक्रमित पुगेका छन्।

कार्यालयका प्रमुख कृष्ण मिजारले पछिल्लो समय डिस्चार्ज हुने भक्तपुरका संक्रमितहरुको संख्यामा उल्लेख्य सुधार आएको बताए । उनका अनुसार भक्तपुरमा संक्रमितको संख्याभन्दा डिस्चार्ज हुनेको संख्या बढेसँगै यो सुधार भएको हो।

चाडवाडको कारण कोरोना भाइरस परीक्षण नै न्यूनमात्रै भएको थियो । जसले गर्दा संक्रमितको संख्यामा पनि कमी आएको प्रमुख मिजारको भनाइ थियो । उनका अनुसार बिहीबार भक्तपुरमा ७५ जनामात्रै नयाँ संक्रमित थपिए।

८८.१२ प्रतिशत होम आइसोलेसनमा
भक्तपुरका सक्रिय कोरोना भाइरस संक्रमितमध्ये ८८.१२ प्रतिशत होम आइसोलेसनमा रहेका छन् । कार्यालयका अनुसार ७ सय ७६ पुरुष र ५ सय ८० महिला गरी एकहजार ३ सय ५६ जना सक्रिय संक्रमित रहेका छन् ।

जसअनुसार ६ सय ८५ पुरुष र ५ सय १० महिला गरी एकहजार एकसय ९५ जना संक्रमित होम आइसोलेसनमा रहेको प्रमुख मिजारले जानकारी दिए। उनका अनुसार ९१ पुरुष र ७० महिला गरी एकसय ६१ जनामात्रै अस्पताल तथा नगरपालिकाको आइसोलेसन केन्द्रमा रहेका छन्।

सर्वाधिक संक्रमित मध्यपुर थिमि नगरपालिकामा

भक्तपुरका चार नगरपालिकामध्ये सबैभन्दा बढी कोरोना भाइरस संक्रमित मध्यपुर थिमि नगरपालिकामा रहेका छन् । यहाँ एकहजार ५ सय २४ पुरुष र एकहजार २ सय ११ गरी कूल २ हजार ७ सय ३५ संक्रमित रहेका छन्।

मध्यपुर थिमिपछि सूर्यविनायक नगरपालिका दोस्रो स्थानमा रहेका छन् । यहाँ एकहजार ३ सय ११ पुरुष र ९ सय ४६ महिला गरी कूल २ हजार २ सय ५७ संक्रमित रहेको स्वास्थ्य कार्यालयको तथ्यांक रहेको छ।

त्यस्तै भक्तपुर नगरपालिकामा ८ सय २४ पुरुष र ७ सय २७ महिला गरी एक हजार ५ सय ५१ र चाँगुनारायण नगरपालिकामा ४ सय १७ पुरुष र २ सय ४४ महिला गरी जम्मा ६ सय ६१ जना संक्रमित रहेका छन्।

९४ जनाको मृत्यु
कोरोना भाइरस संक्रमणका कारण भक्तपुरका ९४ जनाको मृत्यु भएको छ । जसमा पुरुष ६२ र महिला ३२ जना रहेका छन् । यहाँका चार नगरपालिकामध्ये सबैभन्दा बढी भक्तपुर नगरपालिकाका संक्रमितले ज्यान गुमाएका छन्।भक्तपुर नगरपालिकाका २५ पुरुष र १५ महिला गरी ४० जना संक्रमितको मृत्यु भएको छ।

त्यस्तै मध्यपुर थिमि नगरपालिकाका २२ पुरुष र १० महिला गरी ३२ जना संक्रमितको मृत्यु भएको छ।सूर्यविनायक नगरपालिकाका ११ पुरुष र ६ महिला गरी १७ तथा चाँगुनारायण नगरपालिकाका ४ पुरुष र एक महिला गरी ५ जनाको कोरोना भाइरस संक्रमणका कारण मृत्यु भएको स्वास्थ्य कार्यालयको तथ्यांक रहेको छ।